وأكتب ليه؟؟

عمري ما فكرت قبل كده إن أنا اكتب خواطر أو مذكرات أو أيا كان اسم الحاجة اللي أنا حكتبها، لا بالعكس أنا كنت باستغرب الناس اللي بتكتب أفكارها و مشاعرها و أقول ليه بيعملوا كده؟؟

 يمكن عندهم موهبة كتابه، أو يمكن مش قادرين يعبروا عن نفسهم و مشاعرهم بالكلام فبيلجأوا للكتابة، طول عمري أفكر أنه لو صادفتني أي مشكلة أو حتى أي كلام جه على بالي و عايزه أعبر عنه و أقوله حاعرف أتكلم بسهولة و أقول كل اللي أنا عايزه أقوله و اخلص شحنة الكلام و التعبيرات اللي عندي، لكن عمري ما فكرت انه حيكون في يوم مش حلاقي حد يسمعني، و هي دي المشكلة يعني لو كنت قدرت أتغلب على مشكلة الكلام و التعبير عن نفسي و أفكاري، فأنا مش قادرة أتغلب على مشكلة “مين يسمع؟؟” مقدرش أفرض نفسي على حد مش حاحكي للناس غصب عنهم

 و كانت دي الحاجة اللي عمري ما عملت حسابها، فجأة و في غفلة من الزمن الاقي نفسي في يوم كل اللي حواليا بيبعدوا عني بدون إبداء أسباب أو أعذار، انسحاب سريع و منظم و أنا بقيت لوحدي أتكلم و محدش فاضي يسمع، اطلب أتكلم معاهم الاقيهم مشغولين كل واحد في حياته و أفكاره الخاصة، طيب و أنا؟؟

ساعتها بس قررت إني امسك ورقة و قلم و أكتب، أكتب فكرة جت على بالي أو حاجة حسيت بيها، أو حتى اسأل عن ناس بقالي كتير مسمعتش عنهم، و لقيت حاجة قوية بتلح عليا عشان أعبر عن نفسي بالكتابة، و لقيت إن دي الحاجة الوحيدة اللي حتنقذني من إحساس الخرس و الصمت الإجباري

دلوقتي بقى أنا قدرت افهم إحساس الناس اللي بتحب تكتب الخواطر أو المذكرات أو أيا كان اسم الحاجة اللي بيكتبوها، و دي اجابة السؤال

 ”أكتب ليه”؟؟