سعادة غير مبررة

ظروف صعبة، موقف معقد مش باينله اي حل، عقل مش بيبطل تفكير طول الوقت، قلب موجوع وخايف من حاجات مش عارفها، لسان مش بيبطل دعاء لربنا بالصبر وطلب الرضا بالنصيب والقدر..

وفي وسط كل ده زي كده نسمة هوا باردة في عز الصيف يظهر احساس غير مبرر بالسعادة والرضا والهدوء، راحة بال، قلب مرتاح، وابتسامة عريضة، الوان، حب لكل الناس، للشوارع، البيوت، الاشجار، الوروود، الكائنات الحية وغير الحية، يستمر دقايق.. وبعدين يختفي وكل حاجة ترجع تاني زي الاول.

مجرد دقايق قصيرة عابرة بتعدي على عقل وقلب الانسان وبتختفي  تخلي الواحد يفكر، ده كتر يأس ولا كتر إيمان؟؟ من كتر اليأس وفقدان الامل مافيش طريق للحياة غير لحظة سعادة؟؟ ولا من كتر الايمان اتولد امل في أن كل حاجة حتخلص وتنتهي على خير؟؟

ايا كان سواء كده ولا كده هي لحظات بتيجي عشان تنقذ القلب والعقل من الم ووجع ممكن يقضي على الانسان احساس بيجي فجأة عشان يصبرنا نكمل من بعده الخوف والالم..