القرار

أنا اخدت قرار، أيوه و ده قرار نهائي و مش حارجع فيه، أنا مش حتكلم معاها تاني فى حاجة تخص الموضوع ده و أول ما تيجي زي عادتها و تدخل عليا و هي عينيها بتلمع من الفضول و ابتسامتها بعرض وشها و تقرب مني و تقولي قوليلي ها أيه الاخبار؟؟ حاقولها ما فيش جديد، أصلا الموضوع ده خلص و انتهى، و مش حاقول اي تفاصيل و حغير الموضوع خالص

انا بحبها جدا و بحب أتكلم معاها لكن طبعها غريب، دايما بتكون متشائمة، بكون انا مبسوطة و طايرة من الفرحة و بجري عليها عشان أقولها ايه اللي مفرحني الاقيها تقولي، استني بس و تقول حاجة تفوقني بيها من الحلم اللي أنا عايشاه، أقولها سيبيها على ربنا الحكاية لسا فى أولها مبدأتش، عشان خاطري سيبيني أستمتع بكل لحظاته عشان لو الموضوع انتهى ابقى عشت فيه ولو فترة قصيرة و استمتعت و فرحت لكن حتى لو سمعت كلامي مرة ما فيش فايدة، الطبع دايما يغلب التطبع

و هو دة سبب القرار اللي أنا خدته، أيوه أنا مش حكلمها تاني خالص عن الموضوع دة

ولا قيتها جت زي عادتها و دخلت عليا و هي عينيها بتلمع من الفضول و ابتسامتها بعرض وشها و قربت مني و قالتلي “قوليلي ها أيه الاخبار؟؟”

بصيت لها لحظة كده و قلتلها، الاخبار حلوة أوي تعالي لما احكيلك