سخمت

سخمت مين؟؟

سخمت هي الهه الحرب عند المصريين القدماء وكانو بيصوروها على شكل انثى الأسد - اللبؤة-  وفي بعض الاحيان بتبقى على هيئة قطة.

سخمت ليه؟؟

عشان سخمت مظلومة ومحدش مقدرها في وسط الالهه التانين.. نسيوها ليه؟؟ طبعا عشان انثى الأسد وكلنا عارفين ان هي في ثقافتنا مش محبوبة اوي يعني وسمعتها مش تمام، مع انها يا عيني بتتعب جدا ومسئولياتها كتير، كفاية يبقى الاسد –ملك الغابة - قاعد وهي اللي بتطلع تطارد الفريسة وتصطادها وتجيبله الاكل وكمان تخلف وتربي الاشبال وبعد ده كله يبقى هو ملك الغابة وهي حتى اسمها مجرد شتيمة نابية!!

سخمت كمان وكمان

اخترت اسم البلوج على اسمها تكريما لدورها في التاريخ المصري القديم اللي هو تقريبا مش موجود بما ان مصر مدخلتش اي حروب احنا لا سمعنا عن الفراعنة قامو غزو بلاد جنبهم ولا عملو اي منظر، الا ده كل شوية يجي حد يغزوهم وهما يفتكروا بعد 300او 400 سنة كده يقوموا يطردوهم بره.. ومع ذلك سخمت مش اقل من مارس ولا اتينا ولا غيرهم، على الاقل اهي مصرية وواجبنا نشهرها زيهم.