في العائلة خمس فوائد

حاجة حلوة أوي إن الواحد يكون فرد في عائلة كبيرة، وده ليه فوائد كتيرة زي الفوائد اللي في القراءة والفوائد اللي السفر، فاللعائلة الكبيرة أيضا خمس فوائد .. هي إيه؟ أنا أقولكوا

أولا: شيوع الجريمة

يعني مثلا لما واحد يعمل كارثة وينكر، ويجي الثاني يقول والله ما أنا اللي عملتها، وعقبال بقى ما يخلص استجواب جميع الأفراد بتكون الجريمة نفسها إتنست أصلا وطالما ما فيش جريمة، يبقى ما فيش عقاب

ثانيا: تداول الأخبار

أحلى حاجة في العائلة الكبيرة لما تكون قاعد بتفطر الصبح وتلاقي الأخبار كلها جاية لغاية عندك، نطفي بقى التلفزيون ونقعد نسمع تلاقي الأخبار من الشرق ومن الغرب بالإيجاز أو التفصيل حسب الرغبة وأنت قاعد في مكانك

ثالثا: الثراء السريع

من أهم فوائد العائلة الكبيرة إن طول ما أنت ماشي بتلاقي فلوس، أيوه بجد. مثلا محفظة على السفرة وطالع منها خمسة جنية حنسيبها كدة لأ طبعا ماينفعش، وبعدين على الكرسي تلاقي شنطة فيها اتنين تلاتة جنية فكة كده، وفي المطبخ باقي الطلبات ومحدش بيحس بالفكة، يبقى على اخر اليوم تلاقي نفسك طلعت بتلاتين اربعين جنية كده من غير تعب ولا شغل ولا وجع دماغ

رابعا: التسلية

يا سلام بقى لما بتيجي لحظات الهزار عند كل الافراد فى لحظة واحدة، بيبقى السيرك القومي بالظبط، ناس بتضحك هنا وناس بتضرب بعض هناك وعيال صغيرة بتطلع من تحت الكنب والكراسي، منتهى التسلية لا روتانا سينما ولا حتى اعلانات ميلودي

خامسا: الهدف القومي

ودي الحاجة اللي شعب مصر كله بيفتقدها الا الناس اللي عايشة فى عائلة كبيرة، دايما بنجتمع على هدف و بيكون هو الشغل الشاغل لينا كلنا بس يا عيني بقى على المستهدف، يعني حد عنده امتحان، او حد حيتخطب او يتجوز، او ممكن حد جايله شغل، بتبقى غرف العمليات فى كل مكان والتليفون مش بيبطل رن والناس كلها بتتابع الحدث لحظة بلحظة وده ما بيفرقش فيه اى مسافات او حواجز كله بيسأل وكله بيعرف ولما يخلص الهدف او نخلص على المستهدف بمعنى أصح، نلف و نيجي على اللي بعده

وده بيثبت إن دايما

عائلة كبيرة .. تساوي حياة أفضل