شويه ملاحظات كده جت في بالي من وحي الفيس
بوك والفروق والاختلافات الرهيبة اللي بقت في سلوكياتنا وشخصياتنا بسبب الفيس بوك
وده طبعا بسبب دوره العظيم في زيادة "التواصل الاجتماعي" بين الناس وبعض
يعني مثلا عمرك ماكنت قاعد مع حد قبل كده وسابك بتتكلم وراح مطلع الموبايل وفاتح
الفيس بوك وقاعد يضحك مع نفسه ويكتب كومنتات لأ والاحلى بقى ممكن يقطع عليك وانت
بتتكلم معاه ويقعد يضحك ويقولك اسمع بقى صفحة نكت الجاهلية كاتبة ايه ويقعد يحكي
حاجات في منتهى الرخامة لحد ما تقوم تمشي وهو مش حاسس ان انت مشيت من قدامه اصلا
ولما تروح بقى ممكن تدخل تكلمه من على الشات واحتمال تلاقيه قاعد مكان ما سبته كمان..
حاجة تانية برضه غريبة جدا لما تقعد تتكلم مع
حد على الشات بالساعات ولما تشوفه متعرفش تقول ولا كلمه حاجة غريبة جدا فعلا مع ان
هو نفس الشخص ونفس الكلام والاكتر انه ممكن لو اتكلم معاك في موضوع من الموضوعات
اللي كنتو بتتكلمو فيها مع بعض على الشات تبقى مستغرب جدا وفاضلك دقيقة وتقول هو
عرف الكلام ده منين؟؟!! زي ما يكون كان شخص تاني خالص والعكس كمان لو حد تعرفه
كويس وبتقابله كل يوم حتلاقي نفسك مش عارف تتكم معاه على الفيس بوك خالص وممكن
تلاقي نفسك بتتحاول تتهرب من الكلام معاه على النت عشان الانطباع اللي انت واخده
عنه ما يتغيرش
وياسلام بقى على الناس الرخمة اللي بتتكلم
بلغة الشات ايوه والله العظيم لما حد بيكلمني بالطريقة دي ببقى عايزه اسيبه وامشي
وغالبا ده اللي بيحصل ده لو مقتعطش علاقتي بيه اصلا، تلاقي ايه مثلا انت واقف في
امان الله وبتهزر مع حد وللأسف وغصب عنك قلت حاجة تضحك تلاقي حد رخم بيقولك "لول" ايه الهبل ده!!! في حاجة اسمها كده طيب ما يضحك اسهل حاجة رخمة
ساعتها ببقى عايزة اقتل اللي واقف قدامي ده فعلا تلاقيني بقول اللهم اغزيك يا
شيطان واروح سايباه وماشيه ولا حد تاني بتكلمه وقلت حاجة كويسة يروح قايل "لايك" ايه القرف ده بجد!!! مايتكلم زي الناس ويقول دي عجباني دي حلوة اوي اي كلام من الكلام
العادي الطبيعي انا مش فاهمة الناس دي طايقة نفسها ازاي كده
والملاحظة الرائعة كمان لما تلاقي اتنين من
اصحابك اتخطبو وهي كانت حاطه 587 صورة وعندها 869 فريند على الفيس بوك وفجأة
الصورة تتحول لصور اطفال او صور من المسلسلات التركي ومبقاش عندها صحاب خالص غير
22 او 23 واحده وطبعا كلهم بنات الا مثلا لو عندها اخوات ولاد او كده دول ممكن
ماتشيلهومش ومش بعيد اسمها كمان يتغير يبقى حاجة على وزن ملكة الاحزان او نونا
كيوت او اي حاجة مستفزة تانية زي كده، وطبعا بيبقى هو مبسوط ومنشكح وحاسس ان هو سي
السيد اللي قدر يروضها ويرسملها حياتها على مزاجه وكل شويه بقى يحط نكت عن الجواز
وان الستات بينكدو على جوازهم وان هو كان حر قبل ما يرتبط وكان زي الطير المحلق
وجت هي تقصقص ريشه وتكبته، وطبعا مش محتاجة اوضح الوضع بيبقى ايه بعد ما مشروع
الخطوبه ده مش بيكمل طبعا البلوك بيشتغل والاغاني بقى بتبقى جرح تاني وكل الناس
بتحب اوي اغنية المرايا بتاعة شيرين اول مابلاقي حد حاطتها بعرف انه هو في موقف زي
ده ومؤخرا وائل جسار بقى بياخد دور شيرين
دلوقتي بقى الواحد لو حاول يبطل او يحد من
استخدام الفيس بوك بيحس ان حاجة كبيرة اوي ناقصاه وان هو منعزل عن العالم ومش حاسس
باللي بيحصل في الدنيا تلاقيه يجري بسرعة على اقرب موبايل ولا لاب توب ويدخل بسرعة
ويقعد يقرا بسرعة يحاول يعوض اللي فاته
وده له تلات نتائج مش حنخرج منهم، يا اما
كلنا حنصاب بفصام وحنعيش بشخصيتين واحده للفيس بوك وواحدة حقيقية، يا اما كلنا
حنبقى مغيبين ومش عايشين في الدنيا ولا فاهمين ايه اللي بيحصل حوالينا، والمؤكد
بقى واللي حنصاب به كلنا ان شاء الله هو مرض السمنة المفرطة لأنه يا كلنا حنقعد
على اللاب توب طول النهار يا اما حنقعد ناكل طول النهار من الاكتئاب لأن احنا مش
لاقين بني ادمين نتكلم معاهم..
